Қазақстанда алдағы күндері ауа температурасы 41 градусқа дейін көтеріледі деп болжанды

Алдағы күндері Қазақстанда 41 градусқа дейін қатты ыстық болады деп болжанды. Сондай-ақ бірқатар өңірде өткінші жаңбыр жауады, деп хабарлайды "Қазгидромет" РМК-ға сілтеме жасаған KAZ.NUR.KZ.

"Қазгидромет" синоптиктерінің мәліметі бойынша, батыс антициклонының ықпалына қарамастан, республиканың солтүстік, шығыс және оңтүстік-шығыс облыстарында өткінші жаңбыр жауады, найзағай ойнап, жел күшейеді.

Бұдан бөлек республиканың қиыр солтүстігі мен оңтүстік-шығысындағы тауларда қатты жаңбыр, бұршақ жауып, бұрқасын күтіледі.

Метеорологтар Сарыарқа даласында және республиканың оңтүстігіндегі шөлді аймақтарында ауа райы жауын-шашынсыз болады деп болжады.

Республиканың батысында, орталығында, оңтүстігінде және оңтүстік-шығысында күндіз қатты ыстық сақталады. 1 тамызда кей аудандарда +41 градусқа дейін өте қатты ыстық күтіледі.

Еске салайық, синоптиктер Астанада тамыздың басы жаңбырлы болады деп болжады.

Сондай-ақ мамандардың мәліметінше, осы аптада Шымкентте күн 43 градусқа дейін ысиды.

Ал Алматыда шілденің аяғы жаңбырлы болады деп болжанды.

Мәтіннен қате тапсаңыз, бізге жазыңыз