"Оңтүстік аспанын күзетеді": Шымкентте әуе капитаны ұшақты 15 жасынан бері басқарып жүр (видео)

Шымкенттегі әскери бөлімшелердің бірінде 10-сыныптан бастап ұшақ басқарып жүрген әуе капитаны қызмет етеді. Ол мұндай қызықты әрі қиындыққа толы жұмысы туралы айтып берді, деп хабарлайды KAZ.NUR.KZ Ontustiktv.kz арнасына сілтеме жасап.

Телеарнаның сайтында хабарланғандай, Шымкенттегі № 55652 әскери бөлімінің әуе базасында 10-сыныптан бастап ұшақ басқарған капитан жұмыс істейді. Әуе кемесіне мініп, оңтүстік аспанын күзететін олардың жұмысымен танысуға мереке қарсаңында мүмкіндік туды.

15 жасында ұшақ мінген капитан Наурызбай Шаймағамбетов. Қостанай өңірінің тумасы қазір Шымкент әуе базасында әскери қызметін атқарып жүр.

Әуе базасы Шымкент әуежайының маңында орналасқан. Бұл персонал мен техниканы уақытылы жеткізуге мүмкіндік береді. Мұнда ұшқыштар кез келген жағдайға сақадай сай жүреді.

Техника қателікті кешірмейді. Әскерилердің ұстанымы да осы. Инженер-техниктер мен ұшқыштар өз ісінің шеберлері. Тек бұл сала әскери құпияға толы.

Авиациялық техника, шабуылдаушы ұшақтарға қала тұрғындары кейде шағымданып жатады. Алайда дәл осы эскадрилья Шымкент аспанын барлап, қорғап тұрғанын естен шығармау керек.