Интернетте вирус таратқан қостанайлық тұрғын ұсталды (видео)

Желіде зиян келтірген бағдарлама таратқан қостанайлық тұрғынға сот үкімі шықты. Бұған дейін Ұлттық қауіпсіздік комитеті мен полиция департаменті өкілдерінің оны ұстаған сәтінен видео тараған еді, деп хабарлайды Ішкі істер министрлігіне сілтеме жасаған KAZ.NUR.KZ.

Ведомствоның ақпараттық медиа порталының мәліметінше, Қостанай облысы бойынша ҰҚКД және полиция департамент облыстық прокуратураның үйлестіруімен интернет желісінде зиянды бағдарлама (вирустар) таратумен айналысқан 24 жастағы жергілікті тұрғынның құқыққа қайшы әрекеті тоқтатылған.

Зиянды бағдарлама интернет пайдаланушылардың жеке деректерін (логиндер, парольдер, IP-мекенжайлар) алуға мүмкіндік берді. Оларды интернет-алаяқтар қылмыстық жолмен пайда табу үшін қолдана алады.

"Сотқа дейінгі тергеу материалдары қаскүнемнің заңсыз түрде зиянды бағдарламалар жасауға үйрету бойынша өз қызметтерін сатқанын куәландырады", - делінген хабарламада.

Nº2 сот үкімімен ол Қылмыстық кодекстің 210-бабының 1-бөлімімен (Зиян келтіретін компьютерлік бағдарламалар мен бағдарламалық өнімдерді жасау, пайдалану немесе тарату) көзделген қылмысты жасағаны үшін кінәлі деп танылып, бір жылға бас бостандығын шектеуге, 100 сағатқа мәжбүрлі еңбекке және 15 АЕК (55380 теңге) айыппұл салуға, оның барлық компьютерлік техниканы алып қоюға үкім шығарылды.

Үкім заңды күшіне енді.

Мәтіннен қате тапсаңыз, бізге жазыңыз