Алматыда Құлжа тасжолының бір бөлігі біраз уақытқа жөндеуге жабылады

Алматыдағы Құлжа тасжолының бір бөлігі 23-25 тамызда жөндеуге жабылады. Бұл туралы KAZ.NUR.KZ қала әкімдігінің баспасөз қызметіне сілтеме жасап хабарлайды.

Ведомство мәліметінше, Құлжа тасжолының бір бөлігіне орташа жөндеу жұмыстарын жүргізуге байланысты көлік қозғалысына уақытша шектеу енгізіледі.

"23 тамыз сағат 23.00-ден 25 тамыз сағат 07.00-ге дейін Рысқұлов-Құлжа тасжолының жолайырығынан Халиуллин-Құлжа тасжолының жолайырығына дейінгі аумақта қозғалыс жабылады.

Солтүстік бағытта ШААЖ және Халиуллин көшелерімен тек Талғар тасжолы арқылы жүруге болады. Құлжа күре жолымен көлік қозғалысы тек Рысқұлов даңғылының солтүстік бағытында ғана ашылады", - делінген хабарламада.

Әкімдік өкілдері жөнделетін аумақта ескерту белгілері, мердігер ұйым басшысының байланыс нөмірі жазылған стендтер қойылатынын ескертті.