Найзағай соғып, ұшаққа зақым келген: SCAT компаниясының өкілдері мәлімдеме жасады

Демалыс күндері SCAT ұшағының бірін найзағай соғып, ұшақ зақымданған. Әуекомпания өкілдері оқыс жағдай салдарынан рейстер кестесінде өзгерістер пайда болғанын ескертті, деп хабарлайды KAZ.NUR.KZ.

"Өткен демалыс күндері SCAT әуекомпаниясының бір ұшағына найзағай түсіп, зақым келді. Қазіргі уақытта ұшақ номері кестеден алынды. Компанияның инженерлік қызметі жөндеу жұмыстарын жүргізіп жатыр, жөндеу бірнеше күн жүргізілуі мұмкін.

Осыған байланысты әуекомпания осы аптада 14 рейстің кестесін өзгертуге мәжбүр", - делінген әуекомпаниясының баспасөз қызметі таратқан хабарламада.

Компания өкілдері жолаушылардан scat.kz сайтынан, SMS ескертулерді немесе ұшу кестесін тексеруді сұрайды.

Тамыз айының басында Астана әуежайында SCAT компаниясының бір ұшағының фюзеляжына зақым келгені, осыған байланысты кейбір рейстердің кестесін өзгерту қажет екені хабарланған болатын. Бұдан кейін Астана әуежайының баспасөз қызметі жан-жақты тексеру жүріп жатқанын хабарлады.