Жамбыл облысындағы мектепте "емшімен" кездесудің видеосынан кейін тексеріс басталды

Жамбыл облысы Тереңөзек ауылындағы мектепте дау туындады. Әлеуметтік желіде білім ордасына "емшінің" келгені туралы видео тараған, деп жазады KAZ.NUR.KZ.

Instagram-дағы kris.p.karasai парақшасында қызыл көйлек киіп, тәжге ұқсайтын бас киім киген әйелдің видеосы жарияланды. Жергілікті тұрғындар оны құрметпен қарсы алып жатыр.

Автордың айтуынша, ауылдағы мұғалімдерден Томирис атымен танылған емші Гүлсара Суазқызымен кездесу үшін ақша жинаған. Жергілікті тұрғындар ұстаздардың жинаған қаражатына оған салтанатты шара ұйымдастырған.

"Келіншек мектепке көмектесемін деп уәде беріп, оның орнына жыртылған киім мен сынған ойыншық, істен шыққан компьютер сыйлаған. Кейінірек Гүлсара Суазқызының маскүнемдер мен есірткіге тәуелді азаматтарды емдеумен айналысатыны анықталды. Бұл ауыл тұрғындарының арасындағы даудың өршуіне себеп болды", - делінген хабарламада.

Өңірлік білім беру басқармасы аталған жайтқа қатысты пікір білдірді.

"Тұрар Рысқұлов ауданы Жамбыл атындағы орта мектеп басшылығының мәліметіне сәйкес, аталған мектептің түлегі Көпбаева Гүлсара Суазқызы тұрмысы төмен отбасының 100 баласына қайырымдылық көмек көрсетуді ұсынған. 2024 жылы 29 тамыз күні Тереңөзек ауылының Мәдениет үйінде ауыл тұрғындарының қатысуымен шара өткен. Мектеп басшылығы бұл кездесу туралы жергілікті атқарушы органдарға хабар бермеген", - деді ведомство.

Сондай-ақ, басқарма осы мәселе бойынша Жамбыл облысының Балалардың құқықтарын қорғау жөніндегі уәкілі, өңірдің білім беру саласындағы сапаны қамтамасыз ету департаменті арнайы тексеру жүргізіп жатқанын айтты.

"Сонымен қатар, Жамбыл облысы әкімдігінің білім, Ақпарат және қоғамдық даму басқармалары жұмыс тобын құрды. Тексеру нәтижелері бойынша тиісті шаралар қабылданады", - деп хабарлады ведомстводан.