Алматы облысында екі ауылдың атауы өзгерді (видео)

Алматы облысында екі елді мекеннің атауы өзгерді. ҚазЦИК ауылына қазақ театр педагогикасының негізін қалаушы Асқар Тоқпановтың есімі берілді, деп хабарлайды Almaty.tv телеарнасы.

Елді мекенде айтулы күнге байланысты салтанатты шара ұйымдастырылды. Ал қызыл лентаны кесу мәртебесі құрметті қонақтарға берілді.

Жиналған қауым ауыл атауы өзгергеніне қуанғанын айтып жатыр. Олар мұны Қазақстанның мәдени мұрасын сақтау және насихаттау жолындағы маңызды қадам деп есептейді.

Оған қоса, дәл осы күні Комсомол ауылының атауы Жайнақ деп өзгертілді.

"ҚазЦИК ауылының да, Комсомол ауылының да атауы ауысты. Бұл бәріміз үшін маңызды жағдай. Біздің елдімекенге Асқар Тоқпанов сияқты мықты қайраткердің есімі берілгеніне қуаныштымын", - деді ауыл тұрғыны Ғалия Сағымбекова.