Түркістан облысында бір тонна бауырсақ таратылды

Түркістан облысы Кентау қаласының тұрғындары "Өнерлі өлке" фестивалі аясында 1 тонна бауырсақты тегін таратты, деп хабарлайды KAZ.NUR.KZ Түркістан облысы әкімдігінің ресми сайтына сілтеме жасап.

Әкімдіктің Facebook-тегі ресми парақшасында хабарланғандай, тарихы бай, тағылымы терең Түркістан төрінде "Өнерлі өлке" облыстық өнер фестивалі аясында Кентау қаласының мәдениет күндері басталды.

Бүгін этноауылда ұмыт болып бара жатқан ұлттық тағамдар насихатталып, "Қаратау тәжі" ұлттық аспаптар ансамблінің концерттік бағдарламасы ұсынылды. Ұлттық құндылығымызды дәріптейтін қолөнер шеберлерінің ұлттық нақыштағы көрмесі және шеберлік сағаттары көпшіліктің көзайымына айналса, "Қаратау жауһарлары" өлке тарихынан сыр шертетін көрме және фотоаймақ келген қонақтарға таныстырылды.

Одан бөлек, жастар сауық-сайран құрып, "Алтыбақан" ойынын көрсетсе, жас ақындар айтыс өнерінен сынға түсті. Кентау қаласының халықтық атағы бар "Шапалақ" театры "Аңыз астары" атты көріністер көрсетіп, елдің ыстық ықыласына бөленді. Кентау қаласынан шыққан қала мақтаныштарының "Аңыз адам" көрмесі мен "Дәстүрлер даналығы" ұрпақ тәрбиесіне терең мән берілетін салт-дәстүрлеріміздің ерекше түрлерінен қойылымдар көрерменге жол тартты.

"Түркістан төрінде осылайша ашық аспан астында мәдени шараны барынша жан-жақты көрерменге ұсынған кентаулықтар "БауырсақFest" ұйымдастырып, келген қонақтарға бір тонна бауырсақ таратты", - делінген әкімдіктің хабарламасында.

Айте кетейік, Кентау қаласының мәдени күндері 12 қыркүйекте сағат 10:00-ден ауылшаруашылық жәрмеңкесі, ұлттық ойындар, батпырауық ұшырудан сайыс басталады.