Алматы әуежайы жөндеу жұмыстарына байланысты жолаушыларға үндеу жасады

Келесі аптада Алматы әуежайында пандусты жөндеу жұмыстарына байланысты екінші қабатқа кіру уақытша жабылады. Бұл туралы әуежайдың баспасөз қызметіне сілтеме жасаған KAZ.NUR.KZ хабарлайды.

"Пандусты кеңейтуге байланысты екінші қабатқа кіру 16-21 қыркүйек аралығында уақытша жабылады. Жолаушылар ішкі және халықаралық рейстер терминалдарына бірінші қабат (келу аймағы) арқылы түсіріледі.

Жолаушылардан әуежайға алдын ала келуін сұраймыз. Уақытша қолайсыздықтар үшін кешірім сұраймыз", - делінген хабарламада.

Еске салсақ, 1 маусымда Алматы халықаралық әуежайында жаңа терминал ашылғанын хабарлаған едік. Дәл осы күні жаңа терминалдан алғашқы рейс ұшты.

Сағат 08.38-де (жоспарланған уақыт 8.25) Лондон-Алматы бағыты бойынша Air Astana ұшағы ұшып келді. Ал сағат 9.30-да Air Astana әуекомпаниясының Алматы-Доха бағыты бойынша бірінші рейсі ұшты.