"Соқтығысып жатқан көліктер көп": депутат Түркістан мен Шымкент арасында электричка қатынасын қарастыруды ұсынды

Депутат жол-көлік оқиғасын азайту және қауіпсіздікті қамтамасыз ету мақсатында Түркістан мен Шымкент қаласының арасын байланыстыратын жылдам жүретін жолаушылар пойызын қарастыруды ұсынды, деп хабарлайды KAZ.NUR.KZ.

Статистикалық мәліметтерге сүйенсек, жыл басынан бері ел аумағында 1300-ге жуық адам жол апатынан көз жұмып, 16 мың адам зардап шеккендігін көреміз. Осыған байланысты Мемлекет басшысы Қасым-Жомарт Тоқаев биылғы Жолдауында жол қауіпсіздігіне ерекше назар аударды. Президент жол-көлік инфрақұрылымын жақсарту және интеллектуалдық жүйені енгізу арқылы жол қауіпсіздігін қамтамасыз ету керектігін жеткізді.

Расында бүгінде көпшілік тұрғындар ақылы автобанға көңілі толмайды. Түркістан облысының тұрғындарымен кездесуімде "Батыс Еуропа – Батыс Қытай" ақылы жолындағы жағдайлар жүргізушілер мен жергілікті тұрғындарды қатты алаңдатып отырғанына куә болдым. Себебі, жол апаты көбейіп, соның салдарынан қайтыс болушылардың қатары артқан.

Түркістан облысы полиция департаментінің мәліметі бойынша, биылғы жылдың 8 айында автобанда 64 рет жол-көлік оқиғасы болып, салдарынан 89 адам дене жарақатын алған. 21 адам көз жұмған.

Бұған басты себеп, біріншіден ақылы жолдың талапқа сай келмеуі болса, екіншіден жүргізушілердің жауапкершілікті сезінбеуінен деп білемін.

Жолдардың сапасы сын көтмейді. Әсіресе, Шымкент пен Түркістан арасындағы жолдың тоз-тозы шыққан. Жол бойындағы сервис те ақсап тұр. Жүргізушілерге де лайықты жағдай жасалмаған. Жол жиектері қоршалмаған. Соның салдарынан жол үстіне шығып кеткен жылқыларға соқтығысып жатқан көліктер көп.

Ақылы жолға қатысты екінші жағдай – бағалар өте қымбат. Шет елдердегі автобан құнымен салыстырғанда, біздегі жүк көлігінің жүргізушілері 3 есе қымбат төлейтіндіктерін айтып, шағымдануда.

Жалпы, Түркістан облысы аумағында "Батыс-Қытай, Батыс Еуропа" көлік дәлізінің ұзындығы 417 шақырымды құрайды.

Осы айтылғандарды ескере отырып, келесі шараларды қолға алуды ұсынамын:

1. Жоғарыда аталған жолда жолаушылардың қауіпсіздігін күшейту.

2. Жолдар жөнделіп, талапқа сай болғанша ақылы жолдағы бағаны төмендету.

3. Түркістан мен Шымкент қаласының арасын байланыстыратын жылдам жүретін жолаушылар пойызын қоюды қарастыру (электричка). Бұл сонда қызмет атқаратын мемлекеттік қызметкерлер мен қалаға келген туристерге де өте тиімді болар еді әрі жолдағы көлік ағынының азаюына септігі тиеді. Бұл жол апатын болдырмаудың басты себебі болар еді.