Бас прокурор Telegram-дағы бірнеше арнаға тексеріс жүргізілетінін хабарлады

Бас прокурор Берік Асылов интернетте суицидті насихаттау дерегі бойынша сотқа дейінгі үш тергеу басталғанын айтты. Бұл туралы KAZ.NUR.KZ бас прокурордың X әлеуметтік желісінде жазбасына сілтеме жасап хабарлайды.

"Интернетте өз-өзіне қол жұмсауды насихаттағаны үшін прокуратура Қылмыстық кодекстің 313-1-бабы бойынша сотқа дейінгі үш тергеу бастады.

Telegram-дағы бірнеше арнаның қатысушылары мен администраторлары балаларды суицидке итермелейтін контентке қатысты тексеріледі", - деді Берік Асылов әлеуметтік желідегі хабарламасында.

Еске сала кетейік, қыркүйекте Алматыда бірнеше суицид оқиғасы болды. 12-22 қыркүйек аралығында 10 күннің ішінде төрт баланың өз-өзіне қол жұмсағаны хабарланды.

Оқу-ағарту министрлігі қайғылы оқиғаға байланысты ата-аналарға үндеу жариялады. Комитет балалардың киберқауіпсіздігін қамтамасыз ету мәселесіне алаңдаушылық білдіріп, ата-аналардан кіретін сайттар мен балаларының онлайн белсенділігіне ерекше назар аударуды сұрады.