Шымкентте полицейлер жоғалып кеткен 7 жасар баланы жарты сағатта тапты

Шымкентте полиция полкі қызметкерлері жоғалып кеткен 7 жасар баланы жарты сағатта тауып, анасына тапсырды. Бұл туралы KAZ.NUR.KZ Патрульдік полиция полкінің Instagram-дағы парақшасына сілтеме жасап хабарлайды.

Тұран ауданы Гагарин көшесінен дүкенге барар жолда 7 жасар бала көзден таса болған. Анасы баланы 3 сағаттай іздеп, нәтиже шықпаған соң полиция қызметкерлерінің көмегіне жүгінген.

Жоғалған баланы жедел-іздестіру шараларына взвод командирі полиция аға лейтенанты З.Зейнұлла және полиция аға лейтенанттары Е.Оспанов пен Н.Балаш кіріскен. Жүргізілген іздеу жұмыстарының нәтижесінде жасөспірім бала әл-Фараби ауданы Саттарханов көшесінде адасып жүрген жерінен жарты сағатта табылып, анасына тапсырылды. Баланың анасы тәртіп сақшыларына алғыс айтты.

Еске салайық, Қарағанды облысында жоғалған 5 жасар баланы 400-ден астам адам іздеген еді. Төрт сағатқа созылған іздеу жұмыстарынан соң бала аман-есен табылды.