"Колледжге кеткен": Ақтауда 15 жастағы қыз бес күннен бері іздестіріліп жатыр

Ақтауда 15 жастағы қыз 15 қазанда таңертең колледжге кетіп, қайтып оралмаған. Іздестіру жұмыстарын полицейлер мен "LIDER.KZ" еріктілер тобы жүргізіп жатыр, деп хабарлайды аймақтық Lada.kz басылымы.

Аймақтық басылым мәліметінше, 15 жастағы Нұрсая Құралбаева Мұнайлы ауданында тұрады.

Сейсенбі, 15 қазанда сағат 08:00 шамасында ол Ақтау қаласындағы политехникалық колледжге үйінен шығып кеткен. Қазіргі уақытта оның қайда екені белгісіз.

Еріктілер полицейлермен бірге жоғалған қызды іздестіру жұмыстарын жүргізуде.

Бойжеткеннің дене бітімі орташа, шашы ұзын, бойы 165-170 сантиметр. Үстінде қара жеңіл күртеше, қара шалбар, ақ жолақтары бар қара кроссовка болған.

Полицейлер Нұрсая Құралбаева туралы мәлімет білетіндер болса, 102 нөміріне хабарласуды сұрайды.