Атырау облысында ауылда тұратын 12 жастағы модель Ресейдегі "Жыл адамы - 2024" шарасына шақырту алды

Атырау облысы Құрманғазы ауданы Көптоғай ауылының тумасы – 12 жастағы Мәриям Ишанғалиева кішкентай кезінен модель болып, сахнаны бағындырып жүр. Жақында ол Ресейде өтетін "Жыл адамы - 2024" шарасына шақырту алды, деп хабарлайды KAZ.NUR.KZ тілшісі.

Мәриям Ишанғалиева – Сәбит Мұқанов атындағы орта мектептің 6-сынып оқушысы. Анасы Арай Қарабалаеваның айтуынша, Атырау қаласында өткен Batys fashion week сәнгерлер апталығында қызы "Vip model-2024" атағын жеңіп алған. Сол шарада көрші елдің эксперттері Мәриямның қабілетін жоғары бағалап, оған жыл соңында өтетін Ресейдегі шараның қадірлі қонағы болуға ұсыныс айтқан.

"Сәнгерлер апталығында мамандар Мәриямға "Сен бізді қуанту үшін келген жарық жұлдызсың" деп, оған жоғары баға берді. Қазір сол Ресейде өтетін шараға қызу дайындық үстіндеміз. Біздің ауыл қаладан шалғай жерде орналасқан. Ол жерде қаладағыдай модель мектебі жоқ, маман да жоқ. Бірақ қызым Youtube, TikTok-тан кәсіби модельдерді қарап, солардан үйренеді. Есте сақтау қабілеті жоғары", - дейді Мәриямның анасы.

Арай Қарабалаева қызының алты айлық, ал салмағы 920 грамм болып дүниеге келгенін айтады. Кішкентай кезінде көп ауырғанын, дәрігер жағалар жүргенін еске түсірді.

"Ақшаң болса қарайды, болмаған күндері қиналағанымыз да бар. Сол кезде Мәриям "Өскенде Кореяға барып медицинаны оқимын, дәрігер боламын, ақшасы жоқтарды тегін емдеймін" деп жиі айтушы еді. Сол арманы әлі де бар. Сабағында озат. Бимен бос уақытында айналысады",- дейді Арай Қарабалаева.

Осыған дейін Мәриям Ишанғалиева халықаралық "Әлем жұлдызы-2021" сұлулар байқауының гран-при иегері, Сочи қаласындағы халықаралық жас модельдер байқауының  "Топ модель-2022" атағының бірінші орын иегері, Мәскеу қаласындағы  сән көрсетілімінде "Үздік модель-2022" атағының иегері атанып, Мәскеу қаласындағы "Әлем сұлуы-2023" байқауының бас жүлдесін жеңіп алған. Одан бөлек түрлі математика олимпиадаларында да үздік нәтиже көрсетіп жүр.

Автор: Әйгерім Сайқын