Павлодарда қылмыс әлеміне танымал адам ұсталды

Павлодарда қылмыс әлеміне танымал адам өндіріс кәсіпорынын рейдерлік жолмен тартып алды деген күдікпен ұсталды. Бұл туралы KAZ.NUR.KZ осы аймақтың экономикалық тергеп-тексеру департаментіне сілтеме жасап хабарлайды.

Мекеме мәліметінше, қызметкерлер сотқа дейінгі тексеру аясында рейдерлік қылмыс жасаған болуы мүмкін күдіктінің ізіне түскен. Ол аймаққа танымал адам болып шықты. Күдіктінің аты-жөні жарияланбады.

"Қылмыс әрекеті салдарынан кәсіпорын иесі 1 млрд теңгеден аса шығынға ұшыраған. Павлодар қаласының Мамандандырылған тергеу сотының санкциясымен, күдікті 2 ай мерзімге қамауға алынды", - деп хабарлады департамент.

Бұған қоса, ресми мәліметте күдіктінің өзге адамға тиесілі мүлікті тартып алуға қатысты басқа да әрекеттері анықталып жатқаны айтылған. Осы іске қатысты басқа да мәлімет тергеу мүддесіне сай жарияланбайды.

Мәтіннен қате тапсаңыз, бізге жазыңыз