Күн сәулесі бірінші боп түсіп, мешітінде елдегі ең алғашқы азан оқылатын Қазақстандағы ауылдан бір күн

Отандық фотограф Ернар Алмабек Қазақстанның ең шығысында, Алтайдың аясында, бұқтырманың жағасында жатқан Аршаты ауылында болып, ертегі әлемінен кем түспейтін тамаша табиғатқа ие ауылдың тыныс-тіршілігімен танысып қайтты, деп хабарлайды KAZ.NUR.KZ фотографтың желі парақшасына сілтеме жасап.

"Еліміздегі ең алғашқы азан осы ауылдың мешітінде шақырылады. Мұнда Күн сәулесі бірінші боп түседі. Судың бастауы да осында. Бұл ауылдан тұрып қарасаң, бүкіл Қазақстан батыс боп саналады.

Қиыр шығыста жатқан Аршатымен таныс болыңыздар! Қазақстан Аршатыдан басталады!", - деп жазған фотограф Instagram желісіндегі парақшасында ауылдың видеосын бөлісті.

Аршаты ауылы үш бірдей мемлекетке — Ресей, Моңғолия мен Қытайға шекаралас орналасқан. "Судың мөлдірін біз ішеміз, күннің шыққанын біз бірінші көреміз" дейді аршатылықтар фотографқа.

Ернар Алмабектің айтуынша, алыстығына қарамастан, бұл ауылда ұялы байланыс жақсы ұстап тұр. Бірақ Шығыстың басқа ауылдары сияқты бұл жақта да газ жоқ. Көмір қымбат. Десе де орман алыс емес. Тұрғындар отын жинап жағады.

"Мұнда тұратындардың барлығы таза қазақ. Бұрын орыстар болған, бірақ олар көшіп кетті. Тұрғындар өлім болғанда, той болғанда бәрін атқарып, бір-біріне болысып жүреді. Бізде жұмыс жоқ, сол қиындау", - дейді тұрғындардың бірі фотографқа.

Аршаты Қатонқарағай ұлттық паркінің шекарасына кіреді. Ауылда аңның түр-түрі мекен етеді. Қасқыр, аю, барыстар тым жақын келетін кездер де болады екен.

"Жергілікті жұрт орман шаруашылығының қызметкерлеріне "барыс баққан батырлар" деп лақап ат қойыпты. Бұл сөз де негізсіз емес, өйткені орманшылар расында күні-түні тау кезіп, фототұзақ құрып, аңдарды қаскөйлерден қорғаумен жүреді. Олар құрған фототұзақтың бірін бірге барып тексеріп қайтайық дедік", - дейді Ернар.

Жол бойы ну орман мен көздің жауын алар табиғатқа тамсанған фотограф әр тұсқа үйілген төмпешіктерге назар аударып, жол бастап келе жатқан қызметкерден мұның не екенін сұрайды.

Қызметкердің сөзіне сенсек, бұл — құмырсқа илеуі. Үлкендігіне таң болған қонақтар илеудің қасында жиі фотоға түседі екен. Қызметкерлер жылда жоспар бойынша бес құмырсқа илеуін қоршап отыратынын айтты.

Фототұзаққа осы жолы қабандар түскен екен. Одан бөлек орманшылар фотографқа бұған дейін түскен барыстың, аюдың видеоларын көрсетті.

Кешке қарай ауылды атшанаға отырып аралаған фотограф, өзін сол сәтте ерекше бақытты сезінгенін, аршатылықтар керемет жерде тұрып жатқанына көзі жеткенін жасырмады.