Депутаттар Астана халқының санын шектеуді ұсынды

Бүгінде Астанада халық саны бір жарым миллионнан асып кеткен. Ірі қалалардағы көші-қон жайын талқылаған мәжілістегі жиында Астана халқының санын шектеу мәселесі айтылды. Үкімет мүшелері де, депутаттар да өйтпеске амал жоқ деп отыр. Себебі — бас қаланың инфрақұрылымы 3-4 миллион халық нөпіріне дайын емес, деп хабарлайды "КТК" арнасы.

Миграциялық дүмпуді өз пайдасына асырғандар пәтерге тіркеуді қып-қызыл бинеске айналдырған. Әкімдік бір пәтерде 800 адамның бір мезгілде тіркелген дерегін жуырда әшкере етті. Мұндай 924 мекенжайдың бүгін қожайындарымен әңгіме басқаша өрбіген. Енді олар осы тірлігі үшін заң алдында жауап береді.

"Азаматтар бір үйге 800-ден бекерден-бекер кіріп жатқан жоқ, жағдайы болмағаннан кейін. Сондықтан болашақта 2 миллион қала бола ма, жоқ 3 миллиондық қала бола ма, қаланы жоспарларлауда алдын ала болжам болатын шығар. Астананың қалай салынғанын білеміз. Жапон архитекторлары айтты ғой, мына теңіз бен мұхиттың ортасында қала салып үйренген. Біз енді, Құдайға шүкір, Сарыарқаның төріндеміз", - дейді мәжіліс депутаты Жигули Дайрабаев.

Қала миграциясын реттеу мақсатында Астананың кіреберісіне алдағы уақытта құлып салынуы мүмкін. Тар көшелер жайына тоқталған вице-премьер Серік Жұманғарин, біздің елдің жолдарын Еуропамен салыстырып өтті. Өзге елде де сол жол, тек халқы қоғамдық көлікпен жүреді.

"Шамалы шектеу керек, адам санын, миграцияны. Басқа өңірлерге жіберу керек. Ол үшін жұмыс орындарын ашу керек. Мекемелер, үлкен ірі бизнесті. Енді мына жол туралы. Бір концепция бар — қаншалықты жолды кеңейтсең, соншалықты көлік те көбейеді", - дейді Ұлттық экономика министрі, Қазақстан премьер-министрінің орынбасары Серік Жұманғарин.

Депутаттар ақылы автотұрақ мәселесін де көтерді. Қала атқамінерлерінің мәліметінше, барлық автотұрақ шаһар меншігіне өткен. Әзірге әлеуметтік нысандардың қасындағы тұрақтар да тегін.

"Мемлекет халықтан, яки жердің иесімен ақылдаспай-ақ, 2018 жылдан бері қалада ақылы автотұрақтар құрды және оны жекеменшік компанияларға беріп тастады. Мәселен, соңғы мәліметті айтайын, 2021-2023 жылдары ақылы автотұрақтарға астаналықтар 726 миллион теңге төлесе, соның 617 миллионы жекеменшік компанияның қалтасына кетті. Яки бюджеттен тыс кетті деген сөз", - дейді мәжіліс депутаты Нартай Сәрсенғалиев.

Қала әкімдігі енді автотұрақ ақысы толық мемлекеттің қамбасына түседі деп отыр.

Депутаттар қазақстандықтарға тұрғын үйін міндетті сақтандыруды да ұсынды. Себебі бюджет қаражатының шектеулі екенін ескерсек, мемлекет жылда табиғи апаттан зардап шеккен үйлерді қалпына келтіре алмайды. Әзірге бұл шетелдегі қалыпты тәжірибе талқылау үстінде.

Дереккөз: "КТК" арнасы