Мопедін тіркеп үлгермеген қазақстандықтар не істейді: ішкі істер вице-министрі жауап берді

Ішкі істер вице-министрі Игорь Лепеха мәжіліс кулуарында мопедтерді тіркеу барысы туралы айтты, деп хабарлайды KAZ.NUR.KZ тілшісі.

Игорь Лепеха бүгінгі таңда елімізде 18 200 мопед тіркелгенін мәлім етті.

"Жалпы қанша мопед бар екенін ешкім білмейді, әртүрлі сан айтылады. Бір ғана атап өтерлік жайт, бізде былтыр осы санаттағы 22 мың куәлік берілсе, биыл - 2,5 мың. Бірақ мопеді жоқ адамдар да жүргізуші куәлігін алуы мүмкін. Ал әзірге осы, қанша мопед тіркеліп үлгерсе, соншасы жүреді. Қалғандары тұрады.

Осы мүмкіндікті пайдалана отырып, 4 сәуірге дейін аз ғана уақыт қалғанын айтқым келеді. Тіпті халыққа қызмет көрсету орталықтарынан келгендердің барлығын тіркеп үлгеру үшін осы күндері жұмыс уақытын созуды сұрадық. Өйткені содан кейін бұл адамдар мопедімен заңды түрде жүре алмай қалады", - деді ол.

Ол тіркеуден өтпеген мопедтер айыппұл тұрағына қойылатынын еске салды.

"Құжаты түгел жүргізушілер ғана көлігін жүргізе алады", - деді Лепеха.