Ұялы байланыс тарифтері неге қымбаттап жатыр: Цифрлық даму вице-министрі жауап берді

Министрлер кабинетінде өткен брифингте Цифрлық даму вице-министрі Дмитрий Мун ұялы байланыс тарифтері неліктен қымбаттап жатқаны туралы сұраққа жауап берді, деп хабарлайды KAZ.NUR.KZ.

Журналистер Қазақстанда ұялы байланыс қызметтеріне тарифтер неліктен үздіксіз көтеріле беретінін сұрады.

"Өткен айда байланыс үшін 4600 теңге төлесек, бір айдан кейін 5600 болды. Неге шектеу енгізбейсіздер? Қазақстандықтардың жалақысы ай сайын көтеріліп жатқан жоқ қой", - деді журналистер.

Вице-министр Дмитрий Мун байланыс сапасын арттыру бойынша жұмыстар жүргізіліп жатқанын атап өтті.

"Операторлардың тарифтерін реттеу функциясы Бәсекелестікті қорғау және дамыту агенттігіне жүктелген, бізге белгілісі – операторларға тарифтерінің құрамдас бөліктерін көрсетсін деген хабарламалар жіберілген.

Ережелерге сәйкес қоғамдық тыңдаулар мен тиісті процедуралар өткізілуі керек. Қазіргі уақытта министрлік тарабынан біздің құзыретіміз шегінде ешқандай шектеу қою мүмкін емес. Бұл Бәсекелестікті қорғау және дамыту агенттігінің құзырында" - деп жауап берді ол.

Мәтіннен қате тапсаңыз, бізге жазыңыз