Қазақстанда пранкке тыйым салынуы мүмкін

Мәдениет және ақпарат министрі Аида Балаева сенат кулуарында пранкке тыйым салу жоспарына қатысты пікір білдірді, деп хабарлайды KAZ.NUR.KZ тілшісі.

Пранк – бұл біреудің реакциясын келеке ету үшін адамды әдеттен тыс немесе стресстік жағдайға түсіретін әзіл немесе ойын. Қазақстан билігі мұндай видео түсірілімге тыйым салуды қарастырып жатыр.

Мәдениет және ақпарат министрі бұл ақпаратқа қатысты пікір білдірді.

"Белгілі бір адамдардың рұқсатынсыз түсірілетін жекелеген түсірілімдер бар. Сондықтан, әрине, жұмыс тобы енді ғана құрылып жатқандықтан, бұл ережені сіздермен бірге талқылаймыз.

Қаласаңыздар, мен барлығыңызды осы жұмыс тобына қоса аламын, осылайша біз кімдерді түсіруге болады, кімді түсіруге болмайды және қалай түсіру керек екенін түсінеміз. Мұны жұмыс тобында талқылайық, өйткені бізге жеке шағымдар да түсіп жатыр. Сондай-ақ азаматтар бір жерге бару, тіпті достарымен қыдыру мүмкін емес екенін жазып жатыр", - дейді министр.

Аида Балаева бұл тыйым шенеуніктердің өзін қорғау үшін істеп жатқан әрекеті ме деген журналистердің сауалына да жауап берді.

"Шенеуніктер, мұндайға үйреніп қалдық. Біздің туыстарымыз да жоқ, жеке өміріміз де жоқ. Өйткені қайда барсақ та бізді түсіріп жатады. Алайда біз де осы елдің азаматтары сияқты адамбыз. Сондықтан мәселе нақты шенеуніктер емес, жалпы осы бағытты ретке келтіру керек.

"Сондықтан, бірге талқылайық. Жұмыс тобын құрамыз, бізге келіп түскен сұрақтарды, соның ішінде журналистердің де, қарапайым азаматтардың да сұрақтарын талқылаймыз", - деп түйіндеді сөзін министр.

Мәтіннен қате тапсаңыз, бізге жазыңыз