Атырау облысында ауыл шаруашылығы өнімдерінің жалпы шығарылымы 116,8 млрд теңгеге жетті

Атырау облысында 2025 жылғы қаңтар-қазан айларында ауыл, орман және балық шаруашылығы өнімдерінің жалпы шығарылымы 116,8 млрд теңгені құрады. Бұл туралы Атырау облысының әкімдігі хабарлады.

Бұл көрсеткіш өткен жылдың сәйкес кезеңімен салыстырғанда 108,6% ілгерілеуді көрсетіп отыр. Оның ішінде өсімдік шаруашылығындағы өнім көлемі 52,7 млрд теңгеге жетсе, мал шаруашылығы 61,7 млрд теңгені құрады.

"Өңірдегі мал басы да көбейді. Бүгінде облыста 238 мың бас ірі қара, 590 мың бас қой-ешкі, 150 мың басқа жуық жылқы, 43 мың бас түйе, 243,8 мың бас құс бар. Есепті кезеңде облыста 40 мың тонна ет, 27,6 мың тонна сүт, 43 млн дана жұмыртқа алынды",- деді облыстық ауыл шаруашылығы басқармасының басшысы Амангелді Саламат.

Облыста егін жинау жұмыстары толық аяқталған. Егілген егістік алқап түгел жиналып, барлығы 144,3 мың тонна өнім алынған, ішінде 68,7 мың тонна көкөніс, 39,6 мың тонна бақша өнімі, 7,3 мың тонна картоп және 28,6 мың тонна мал азықтық дақыл өндірілген.

Айта кетейік, 2025–2027 жылдары өңірде инвестициялық 12 жоба іске асырылып, 460 жаңа жұмыс орны құрылмақ. Оның ішінде 2025 жылы 6 жобаны іске қосу жоспарланған.

Мәтіннен қате тапсаңыз, бізге жазыңыз