Аралдың табанынан тұщы су шықты (видео)

Қазақстан орманшылары жыл соңына дейін Арал теңізінің аймағына бір миллионнан астам түп сексеуілді егу жұмыстарын аяқтайды. Жуырда теңіз табанынан құдық қазылып, 500 метр тереңдіктен тұщы су шықты. Тіршілік нәрі көшеттерді суғару үшін пайдаланылады, деп хабарлайды 24.kz.

Ташкентте Орталық Азия елдері орман шаруашылығының мамандары бас қосып, аймақтағы экологиялық мәселелерді шешу жолдарын қарастырды. Арал экологиясымен күресудің бірден-бір жолы ағаш егу. Қазір құрғаған теңіз табанында бұл жұмыстар қызу жүріп жатыр. Қазақстан тарабы жыл соңына дейін 1,1 млн түп сексеуіл көшетін отырғызбақ. Жас талдарды суғару үшін 500 метр тереңдіктен құдық та қазылған.

"Арал теңізінің құрғаған табанында, Қазалыда питомник құрылды. Одан бөлек құрғаған жерінде питомник салу жоспары бар. Қазір құдық қазу жұмысы аяқталды. Бес жүз метрден су шықты. Тұщы су көшеттерді суаруға жақсы", - дейді Орман шаруашылығы және жануарлар дүниесі комитетінің бас сарапшысы Бағдәулет Амангелдинов.

Автор: Дулат Нуркин

Мәтіннен қате тапсаңыз, бізге жазыңыз