Алматы тауларында түнде жас жігіт адасып кетті

ТЖД құтқарушылары өткен түнде Алматы тауларында іздестіру жұмыстарын жүргізді. Төтенше жағдайлар министрлігінің ақпаратынша, тауда 18 жастағы жігіт адасып кеткен, деп хабарлайды KAZ.NUR.KZ.

Ведомство өкілдерінің хабарлауынша, 112 пультіне көмекке мұқтаж жас жігіт туралы хабарлама түскен. Оқиға Алматы қаласының Бостандық ауданында, Алмарасан шатқалында болды.

Өтініш берушінің айтуынша, 18 жастағы азамат тау бағытымен өздігінен төмен түсе алмай, Алёшкин көпірі маңында болған.

"ТЖМ "Барыс" РЖҚЖ ММ жедел тобы Алматы қаласының Құтқару қызметімен бірлесіп оқиға орнына дереу шықты. Проходное шатқалына жеткеннен кейін іздестіру-құтқару жұмыстары күрделі таулы жағдайда жаяу түрде жалғастырылды",- делінген ресми хабарламада.

Бірлескен іздестіру барысында құтқарушылар адасып қалған жас жігітті Терра алаңындағы күркеде тапты. Ол медициналық көмекке мұқтаж болған жоқ. Осыдан кейін Алмарасан тұрағына қарай қауіпсіз түсіру ұйымдастырылды.

Азамат аман-есен құтқарылып, туыстарына тапсырылды.

Мәтіннен қате тапсаңыз, бізге жазыңыз