1 қаңтардан бастап қазақстандықтар жеке куәлікті тегін алады

Опубликовано:22 желтоқсан 2025, 09:53

Қазақстанда 2026 жылғы 1 қаңтардан бастап жеке куәлікті алғаш рет алған кезде және оның жарамдылық мерзімі аяқталған соң ауыстырған жағдайда мемлекетті баж салығы алынбайды. Бұл туралы Ішкі істер министрлігіне сілтеме жасаған KAZ.NUR.KZ хабарлайды.

Ведомствоның Polisia.kz медиа-порталының мәліметінше, мұндай өзгерістерге Ішкі істер министрлігі бастамашы болған.

Бұл құжаттарды алу процесін жеңілдету және азаматтарға түсетін қаржылық жүктемені азайту мақсатында қолға алынған.

"Жеке куәлікті алғаш рет алған кезде тегін беріледі. Сондай-ақ оның жарамдылық мерзімі аяқталған соң ауыстырған жағдайда мемлекеттік баж салығын төлеу қажет емес", - деді Ішкі істер министрлігі Көші-қон қызметі комитетінің төрағасы Аслан Аталықов.

Естеріңізге сала кетейік, былтыр маусымда Қазақстанда жаңа үлгідегі жеке куәлік беріле бастаған болатын. Жаңартылған құжатта не өзгергенін жазған едік.

Бұдан бөлек, жаңа жеке куәлікті енді толықтай онлайн рәсімдеуге болатыны хабарланған еді – құжатты қашықтан қайта рәсімдеуге мүмкіндік беретін пилоттық жоба іске қосылды.

Мәтіннен қате тапсаңыз, бізге жазыңыз