Қазақстанға қарлы боранмен бірге 30 градус аяз келе жатыр

"Қазгидромет" синоптиктері алдағы үш күнге, яғни 25-27 желтоқсанға арналған Қазақстандағы ауа райына болжамын жариялады. Елге циклон жақындап келеді, деп хабарлайды KAZ.NUR.KZ мемлекеттік метеорологиялық қызметке сілтеме жасап.

Синоптиктердің мәліметі бойынша, алдағы күндері Қазақстан арқылы солтүстік-батыс циклоны өтеді. Циклон әсерінен қар жауады, ал оңтүстік аймақтарда қар аралас жаңбыр түрінде жауын-шашын түседі. Жұма, 26 желтоқсанда елдің оңтүстігі мен оңтүстік-шығысында қатты жауын-шашын болады деп күтілуде.

Сонымен қатар синоптиктер республиканың басым бөлігінде бұрқасын, желдің күшеюі күтіледі, ал батыс және оңтүстік өңірлерде көктайғақ болады деп ескертеді.

Бірақ 27 желтоқсанда циклонның орнына батыстан суық антициклон келеді, бұл жауын-шашынның біртіндеп тоқтауына және суықтың күшеюіне әсер етеді:

• түнде елдің солтүстік-батысында және солтүстігінде 25-30 градусқа дейін;
• шығысында 22-30 градусқа дейін аяз болады.

Мәтіннен қате тапсаңыз, бізге жазыңыз