Демалыс күндері Қазақстанның басым бөлігінде қар, боран күтіледі

Синоптиктер 31 қаңтар мен 2 ақпан аралығында Қазақстанда күн райы қандай болатынын болжады, деп хабарлайды "Қазгидромет" РМК-ға сілтеме жасаған KAZ.NUR.KZ.

Метеорологтардың мәліметінше, алдағы үш тәулікте Қазақстан аумағының басым бөлігі атмосфералық фронтальды бөліктердің ықпалында болады.

Осыған байланысты елдің басым бөлігінде қар, боран, оңтүстік және оңтүстік-шығыс өңірлерде жауын-шашын (жаңбыр, қар), кей жерлерде қатты жауын-шашын күтіледі.

Тек Қазақстанның орталық және шығыс бөліктерінде жауын-шашынсыз күн райы сақталады.

Сондай-ақ демалыс күндері республика бойынша тұман, жел күшейіп, батыс, оңтүстік және оңтүстік-шығыс өңірлерде көктайғақ болуы мүмкін.

Солтүстік өңірлерде ауа температурасы түнде -12...-23 градусқа дейін төмендеуі ықтимал, күндіз -8...-18 градус шамасында аяз сақталады. Орталық облыстарда түнде -5...-17 градус, күндіз 0...-10 градус шамасында болады.

Республиканың оңтүстігінде ауа температурасының біртіндеп жоғарылауы күтіледі: түнде ауа температурасы +6...-7 градус аралығында болса, күндіз +3...+13 градус жылы болады.

Оңтүстік-шығыста түнде ауа температурасы 0...-10 градусқа дейін, таулы аудандарда -12..-17 градусқа дейін төмендейді, күндіз +3...+10 градус жылы болады.

Елдің қалған аумағында айтарлықтай өзгерістері күтілмейді.

Мәтіннен қате тапсаңыз, бізге жазыңыз