Ақмола облысында жаппай ауруханаға түскен кадеттердің жағдайы қалай: денсаулық сақтау басқармасы жауап берді

Опубликовано:Кеше, 04 ақпан 2026, 23:28

Ақмола облысында инфекциялық ауруханада жатқан 46 кадет шығарылды. Тағы 12-cі бүгін үйге жіберіледі. Қазіргі уақытта стационарда 42 кадет ем қабылдап жатыр. Бұл туралы КТК арнасы хабарлайды.

Оның ішінде 24 кадетке "қызылша" диагнозы қойылған. Қалғаны жіті респираторлық вирустық инфекция дертіне қарсы ем қабылдап жатыр. Ал емдеу курсын аяқтаған 60 адам бүгінгі таңда бақылауда. Науқастардың 84 пайызы әскери колледж аумағында ашылған провизорлық госпитальда жатыр.

"Кадеттер мен әскери қызметшілерді қосқанда, жалпы контингент саны 520 адам. Оның ішінде 99-ы — сержанттар құрамы, ал 334 адам — ем қабылдап жатқандар, емнен кейін бақылаудағылар және карантиндегілер. Қазіргі уақытта барлық ем және санитария-эпидемиология іс-шаралары жүргізіліп жатыр, жағдай толық бақылауда. Пациенттердің жағдайы қанағаттанарлық, олардың өміріне ешқандай қауіп төніп тұрған жоқ", - дейді Ақмола облысы денсаулық сақтау басқармасының басшысы Нариман Ермеков.

Дереккөз КТК телеарнасы

Щучинсктегі Шоқан Уәлиханов атындағы әскери колледжде білім алушылар арасында қызылша ауруының тіркелуіне байланысты карантин жарияланғанын жазған едік.

Қорғаныс министрлігіне қарайтын бұл оқу орны Щучинск қаласында орналасқан. Кадеттер 11 қаңтарда каникулдан оралғаннан кейін олардың бір бөлігінен инфекциялық аурудың белгілері байқалған.

Мәтіннен қате тапсаңыз, бізге жазыңыз