Алматыда сирена қосылады: ТЖД өкілдері себебін түсіндірді

Ертең, 25 ақпанда Алматыда республикалық оқу-жаттығу өтеді, соған байланысты халықты құлақтандыру жүйесіне техникалық тексеру жүргізіледі, деп хабарлайды KAZ.NUR.KZ қалалық ТЖД баспасөз қызметіне сілтеме жасап.

Алматы қаласы ТЖД баспасөз қызметінің мәліметінше, 25 ақпан сағат 11:00-де Алматы қаласында "Баршаның назарына!" сигналы беріледі – қалада қысқа уақытқа сиреналар қосылады. Сондай-ақ тексеру хабарламасын тарату үшін теле және радиоарналар уақытша тоқтатылып, хабарландыру жүйесі іске қосылады.

"Сабыр сақтауды сұраймыз, бұл – оқу-жаттығу тексерісі. "Баршаның назарына!" дыбыстық сигналы төтенше жағдай қаупі туындағанда немесе орын алған кезде шұғыл хабарламалар алдында халықтың назарын аудару үшін беріледі", - делінген хабарламада.

Алматылықтарға сигналды естіген жағдайда не істеу керек екені түсіндірілді:

• теледидарды немесе радиоқабылдағышты қосу;
• ресми интернет-ресурстар мен мобильді қосымшаларды тексеру;
• берілетін ақпаратпен және әрі қарайғы нұсқаулықтармен мұқият танысу қажет.

Құлақтандыру жүйесі 25-26 ақпанда Алматыда "Көктем – 2026" республикалық командалық-штабтық оқу-жаттығуына байланысты іске қосылатыны хабарланды.

Оқу-жаттығу аясында қала аудандарында өзен арналары мен арық жүйелерін тазарту бойынша профилактикалық іс-шаралар жүргізіледі.

Мәтіннен қате тапсаңыз, бізге жазыңыз