Түркістандағы ботаникалық бақта қызғалдақтар бүр жарды (фото)

Қожа Ахмет Ясауи атындағы Халықаралық қазақ-түрік университетінің "Ботаникалық бақ" ғылыми-зерттеу институтында қызғалдақтар бүр жарды, деп хабарлайды Ғылым және жоғары білім министрлігіне сілтеме жасаған KAZ.NUR.KZ.

Биыл ботаникалық бақтың жылыжайында қызғалдақтың 7 түрлі сұрыпынан 7000 дана пиязшық отырғызылған.

"Биылғы маусымның ерекшелігі – бұған дейін қызғалдақтарды ғылыми зерттеу тобы өсіріп келген болса, осы жылы ботаникалық бақтың жұмысшы мамандары өсіріп шықты. Бұл ғылыми әзірлемелердің тәжірибелік деңгейде тиімді игерілгенін және технологиялардың тұрақты түрде өндірістік үдеріске енгізілгенін көрсетеді", - делінген хабарламада.

Ботаникалық бақта өсірілген қызғалдақтар жыл сайын наурыз айындағы мерекелік іс-шаралар аясында университеттің ардагер оқытушылары мен серіктестеріне табысталады.

Сонымен қатар ғылыми жоба нәтижелерін коммерцияландыру бағытында өнімді нарыққа шығару мүмкіндіктері қарастырылған.

Университет ғалымдары қызғалдақ өсіру, жерсіндіру және селекциялау бағытындағы зерттеулерді кезең-кезеңімен жалғастырып, отандық гүл шаруашылығын дамытуға жүйелі түрде үлес қосуды көздейді.

Мәтіннен қате тапсаңыз, бізге жазыңыз