RU

Бір жеңіс, бір жеңіліс және бас тарту: Олимпиадада еліміздің теннисшілері қандай нәтиже көрсетті

Зарина Дияс
Зарина Дияс. Фото: Photo by Hannah Peters/Getty Images

Токио Олимпиадасында еліміздің теннисшілері қандай нәтиже көрсеткенін Olympic.kz сайты назарға ұсынды.

Теннистен Қазақстанның бірінші ракеткасы Елена Рыбакина Токиодағы Олимпиада ойындарын жеңіспен бастады.

Елена Рыбакина
Фото: Владислав Семенов, Қазақстан ҰОК

Рыбакина бірінші айналымда австралиялық Саманта Стосурмен кездесіп, 6:4, 6:2 есебімен жеңіске жетті.

Еленаның ендігі қарсыласы мысырлық Майар Әбделазиз және швециялық Ребека Петерсон жұбының жеңімпазы болмақ.

Ал Қазақстанның бірінші ракеткасы Александр Бублик Токио Олимпиадасындағы жекелей сында жеңіліс тапты.

Александр Бублик
Фото: Владислав Семенов, Қазақстан ҰОК

Ол ресейлік Даниил Медведевпен кездескен болатын. 1 сағат 4 минутқа созылған кездесуде Бублик 4:6, 6:7 есебімен қарсыласына жол берді.

Енді Александр Бублик Токио ойындарын жұптық сында жалғастырады.

Теннистен Қазақстан командасының мүшесі Зарина Дияс болса, Токио Олимпиадасын бірінші айналымда аяқтады.

Зарина Дияс
Зарина Дияс. Фото: Photo by Zhong Zhi/Getty Images

Қазақстандық теннисші алғашқы кезеңде чехиялық Барбора Крейчиковамен кездескен болатын. Бірінші сетте Крейчикова 5:2 есебімен алда келе жатқан.

Кездесу барысында Дияс жарақатына байланысты жарысты жалғастырмайтынын айтып, матч тоқтатылды.

Еске салсақ, бұған дейін әйелдер арасында 48 келіге дейінгі салмақ дәрежесінде белдескен қазақстандық дзюдошы Галбадрах Отгонцэцэг Токио Олимпиадасында жеңіліп қалғанын жазған едік.

Сондай-ақ, дзюдошы Елдос Сметов қарсыластарын мерзімінен бұрын жеңіп, Олимпиаданың жартылай финалына шыққаны белгілі болып отыр.

Одан бөлек, боксшы Серік Теміржанов қарсыласын екі рет нокдаунға жібергенін жазған болатынбыз.

Сонымен қатар, Токиодағы Олимпиада ойындарында академиялық есуден іріктеу сыны басталып, Қазақстан командасының өкілі Владислав Яковлев іріктеудің бірінші айналымын үшінші орынмен аяқтағанын жазғанбыз.

Мақаланың түпнұсқасы: https://kaz.nur.kz/sport/1923744-bir-zenis-bir-zenilis-zane-bas-tartu-tokio-olimpiadasynda-elimizdin-tennissileri-qandai-natize-korsetti/