Еліміздің футболдан әйелдер құрамасының ойыншысы Юлия Мясникова ресейлік клуб пен Қазақстан құрамасында бір мезгілде қатар өнер көрсетудің артықшылығы мен кемшілігін сөз етті деп жазады Мeta-ratings.kz.
Футболшы қыз қазір ресейлік ЦСКА клубында ойнап жүр. Оның сөзінше, шетелдік клубта өз ойыншыларына басымдық беріледі.
"Бөтен ойыншы кімге керек? Ресейге келсем, ондағылар маған: "Сен орыс емессің, Қазақстаннан келген қазақсың", дейді. Ал Қазақстанға, еліме келсем, "Қайдағы қазақ, қазақ тілін білмейсің" деп бетіме басады. Сені мына жақта да, ол жақта да қабылдамайды", - дейді футболшы.
Сондай-ақ сұхбатта Юлия Мясникова еліміздегі тіл мәселесіне пікірін білдірді. Футболшы өзінің тілді жетік білмеуін Қарағандыда, орыстілді ортада туып-өскендігімен байланыстырады. Спортшының сөзінше, мектепте ол өз тілінде сөйлемейтін ұлты қазақ балалармен дос болған, ал ана тілін білетіндер қазақшаны тек ата-әжелерімен сөйлескенде ғана қолданған.
Мясникова оңтүстік облыстарды жағдайдың керісінше екенін атап өткен. Оның айтуынша, оңтүстікте туып-өскен ұлты орыс қыздар өскен ортасына орай қазақша жақсы сөйлейді.
"Мен мектепте ҰБТ-дан қазақ тілін беске тапсырдым. Бірақ қазақ тілінде үнемі сөйлемегендіктен, естіп өспегендіктен, әрине, проблема болады. Санай аламын, көптеген сөз тіркестерін білемін", - дейді Юлия.
Мақаланың түпнұсқасы: https://kaz.nur.kz/sport/football/1945150-qazaq-qyzysyn-qazaqstan-quramasynyn-futbolsysyn-reseilik-klubtagy-ariptesteri-qalai-qabyldagan/
