Қазақстан U-21 құрамасының аға бапкері Қайрат Нұрдәулетов 2025 жылғы Еуропа чемпионатының іріктеу кезеңінің жеребесінің қорытындысы бойынша пікір білдірді, деп жазады Қазақстан футбол федерациясы.
"Біздің топқа жақсы қарсыластар жиналды деп ойлаймын. Испания, Бельгия және Шотландия құрамалармен соңғы жылдарда кездестік. Сол себепті өткен ойындардың бізге бір көмегі болады деп санаймын. Венгрия мықты қарсыластардың бірі. Соңғы нәтижелерінің жақсы екенін аңғаруға болады. Деңгейі жылдан жылға өсіп келе жатқан ұжымдардың арасында Мальта құрамасы бар. Тобымыздан тартысты ойындар күтеміз. Жас футболшыларымызға мол тәжірибе болады. Жақсы ойын көрсетеміз деп сенемін", - деді ол.
Сонымен қатар Қайрат Нұрдәулетов іріктеу кезеңіне дайындық қалай жүргізілетінін айтты.
"10-18 ақпан аралығында Түркияға барамыз. Сол жақта оқу-жаттығу жиынына қатысып жатқан футболшылардың жағдайымен танысып, сараптамалық жұмыстар жүргіземіз. Біздің ең басты мақсатымыз – ұлттық құрамаға ойыншылар тәрбиелеу. Осы іріктеуде де Астанов, Самородов, Жұмабек сияқты футболшыларды дайындап шығарғымыз келеді", - деді Қазақстан U-21 құрамасының аға бапкері.
Мақаланың түпнұсқасы: https://kaz.nur.kz/sport/other-sports/2007999-nurdauletov-europa-cempionatynyn-irikteu-kezeninin-zerebesi-turaly-pikir-bildirdi/
