Қазақстан кикбоксингінің аңызы Сабыржан Махметов дүниеден озды

Қазақстандағы кикбоксинг пен жекпе-жек спортының негізін қалаған, ең беделді бапкерлердің бірі Сабыржан Махметов дүниеден озды.

Суыт хабарды журналист Қанат Ескендір жеткізді. Сондай-ақ бапкердің өмірден өткенін "Жекпе-жек" федерациясы да растады.

"Бір заманның батыр ұлы еді...бұ кісі де келместің кемесіне мінді деген суық хабар жетті... Бақұл болыңыз, Сабыржан аға...", - деп жазды Қанат Ескендір Facebook-тегі парақшасында.

Kazinform-ның мәліметінше, Сабыржан Махметов КСРО-ның еңбек сіңірген спорт шебері, КСРО және Қазақстан Республикасының еңбек сіңірген жаттықтырушысы, КСРО әуе десант әскерінің (ВДВ СССР) үш дүркін абсолюттік чемпионы, ережесіз жекпе-жектен бірнеше дүркін әлем чемпионы болған.

Агенттіктің жазуынша, қазақстандық жанкүйерлер Сабыржан Махметовті Қазақстан кикбоксингінің аңызы, жекпе-жек спортындағы тәжірибелі маман ретінде жақсы таниды.

Ол елімізде спорттың осы түрін дамытуға зор үлес қосқан. Білікті маман Қазақстанның жекпе-жек федерациясының негізін қалап, оның жетекшісі ретінде ауқымды істер атқарған. 

Сондай-ақ дүниежүзілік "Жекпе-жек" қауымдастығының президенті де болған.

Мәтіннен қате тапсаңыз, бізге жазыңыз