Ұзақ үзілістен кейін рингке оралған қазақ қызы қарсыласын бірінші раундта 3 рет нокдаунға жіберді

Бокстан Үндістанда өтіп жатқан әлем чемпионатының екінші күнін 81 келіге дейінгі салмақта сынға түсіп жатқан Фариза Шолтай қорытындылады, деп хабарлайды KAZ.NUR.KZ тілшісі Спортты дамыту дирекциясының баспасөз қызметіне сілтеме жасап.

Отандық спортшы Әлем біріншілігінің алғашқы жекпе-жегінде Тринидад және Тобаго өкілі Лиан Будраммен жұдырықтасты.

Фариза Шолтай кездесуді жоғарғы қарқында бастап, алғашқы раундтың өзінде қарсыласын үш рет нокдаунға жіберді. Нәтижесінде төреші Лиан Будрамға техникалық нокаут берді.

Айта кетейік, Фариза Шолтай ұзақ үзілістен кейін боксқа оралды. Кейінгі жылдары жарақатпен арпалысқан ол Қазақстан чемпионатына аз уақыт қалғанда ұлттық құрамада бірінші орынды жеңіп алды.

Енді Фариза ширек финалда кениялық Элизабет Адямбо Андиегомен күш сынасады.

Мәтіннен қате тапсаңыз, бізге жазыңыз