Орта салмақта WBO және IBF нұсқалары бойынша әлем чемпионы Жәнібек Әлімханұлы WBC белбеуінің иегері, америкалық боксшы Джермалл Чарлоға үндеу жасады. Бұл туралы KAZ.NUR.KZ Жәнібек Әлімханұлының X желісіндегі ресми парақшасына сілтеме жасап хабарлайды.
BoxingScene.com порталының X желісіндегі ресми парақшасында Джермалл Чарлоның сұхбатының үзіндісі жарияланған еді.
"Мен ыңғайы келсе Жәнібекпен, Адамспен жұдырықтасамын. Мен ешқашан ешкімнен жалтарған емеспін", — деді америкалық боксшы.
Кейін Жәнібек Әлімханұлы бұл жазбаға жауап берді.
"Мен күтіп отырмын", — деп жазды ол X желісіндегі ресми парақшасында.
Айта кетейік, Джермалл Чарло соңғы рет өткен жылы қарашада жекпе-жекке шықты. Ол Хосе Бенавидесті төрешілердің шешімімен жеңген еді (100-90, 99-91, 98-92).
Жәнібек Әлімханұлы соңғы рет рингке өткен жылы қазан айында шығып, неміс боксшысы Винченцо Гуальтьериді 6-раундта техникалық нокаутпен жеңді. WBO және IBF нұсқалары бойынша әлем чемпионы атанған болатын.
Мақаланың түпнұсқасы: https://kaz.nur.kz/sport/boxing/2055710-zekpe-zekti-kutemin-zanibek-alimxanuly-amerikalyq-bokssyga-undeu-zasady/
