Орта салмақта IBF және WBO нұсқалары бойынша әлем чемпионы Жәнібек Әлімханұлы жаңа зеландиялық Андрей Михайловичпен көз түйістірді. Бұл туралы KAZ.NUR.KZ тілшісі хабарлайды.
Қос боксшы арасындағы жекпе-жек 14 шілдеде Лас-Вегастағы (АҚШ) Palm Casino Resort аренасында өтеді. Әлімханұлы екі бірдей чемпиондық атағын қорғайды.
"Менің мақсатым – төрт белбеу. Бірден екі титулды бірінші рет қорғайтыным маңызды емес. Мақсатым – барлық төрт белбеуді жеңіп алып, содан кейін қорғау.
Жекпе-жекке келіскен Андрейге рақмет. Оның кейбір чемпиондардан айырмашылығы менімен жұдырықтасуға келісті. Әрине мен Андрейдің алдағы жекпе-жекте барын салатын жас, жеңілмеген және аш қарсылас екенін түсінемін.
Әдеттегідей Калифорнияда дайындалдым. Лагерьде бәрі жақсы өтті. Менің 4-5 түрлі спарринг серіктестерім болды, олар маған жақсы дайындалуға көмектесті", - деді Әлімханұлы баспасөз мәслихатында.
Жәнібек Әлімханұлы (15-0, 10 КО) соңғы жекпе-жегінде Германия өкілі Винченцо Гуальтиериді алтыншы раундта нокаутпен жеңген еді. Ал Андрей Михайлович (21-0, 13 КО) соңғы рет шаршы алаңға сәуірде шығып, венесуэлалық Эдисон Сальтаринді бесінші раундта техникалық нокаутпен ұтқан болатын.
Мақаланың түпнұсқасы: https://kaz.nur.kz/sport/boxing/2132835-zhanibek-alimhanuly-kezekti-zhekpe-zhegi-aldynda-qarsylasymen-koz-tuiistirdi-video/
