Екінші орта салмақта жұдырықтасатын қазақстандық кәсіпқой боксшы Әли Ахмедовтың келесі қарсыласы анықталды. Бұл туралы KAZ.NUR.KZ тілшісі хабарлайды.
360 Promotions компаниясының хабарлауынша, Әли Ахмедов 20 қыркүйекте Дублинде (Ирландия) жекпе-жек өткізеді. Оның қарсыласы – франциялық боксшы Пьер Дибомбе. Кездесу 10 раундқа жоспарланған.
Дибомбе – Франция чемпионы және Еуропалық бокс одағының (EBU) жеңімпазы. Оның активінде 22 жеңіс, 1 жеңіліс және 1 тең өткен жекпе-жек бар, 12 кездесуін нокаутпен аяқтаған.
Әли Ахмедов соңғы рет биыл мамырда шаршы алаңға шыққан еді. Ол Детройтта (АҚШ, Мичиган) өткен бокс кешінде коста-рикалық Энкарнасьон Диасты техникалық нокаутпен жеңген болатын. Ахмедовтың еншісінде 21 жеңіс, 1 жеңіліс бар, 16 қарсыласын нокаутпен ұтқан.
Айта кетейік, Әли Ахмедовтың мүддесін орта салмақтағы бұрынғы әлем чемпионы Геннадий Головкинге тиесілі GGG Promotions промоутерлік компаниясы қорғайды.
Мақаланың түпнұсқасы: https://kaz.nur.kz/sport/boxing/2159988-21-zhengisi-bar-qazaqstandyq-kasipqoi-boksshynyng-kelesi-qarsylasy-anyqtaldy/
