Қазақстандық кәсіпқой боксшы Бек Нұрмағанбет АҚШ-та өткен кездесуіндегі жеңісінен кейін Сауль "Канело" Альварестің командасына алғысын айтты. Бұл туралы KAZ.NUR.KZ тілшісі хабарлайды.
15 қыркүйекте қазақстандық боксшы Бек Нұрмағанбет Лас-Вегаста (АҚШ) өткен бокс кешінде америкалық Джошуа Конлиге (17-7-1, 11 КО) қарсы кездесу өткізіп, қарсыласын екінші раундта нокаутқа жіберіп, жеңіске жеткен еді.
Қазақстандық кәсіпқой боксшы Сауль "Канело" Альварес (62-2-2, 39 КО) пен Эдгар Берланга (22-1, 17 КО) арасындағы жекпе-жектің андеркартында өнер көрсеткен болатын.
"Менің кезекті жеткен жеңісіме қолдау білдіріп құттықтап жатқан барлық жанашырларыма рақмет! Сондай-ақ осындай үлкен аренада әлемнің үздік боксшыларымен бір қатарда жұдырықтасып, өнер көрсетуіме мүмкіндік берген "Канелоның" командасына алғыс айтамын! Маған қажет көмектің бәрін жасаған кісілерге рақмет!", - деп өз алғысын білдірді Бек Нұрмағанбет Instagram желісіндегі ресми парақшасында.
Сондай-ақ BoxRec.com сайтының мәліметіне сүйенсек, Бек Нұрмағанбет 25 қазанда АҚШ-та жұдырықтасады. Қарсыласы туралы мәлімет әлі нақтыланбаған.
Мақаланың түпнұсқасы: https://kaz.nur.kz/sport/boxing/2162241-kanelonyng-komandasyna-algys-aitamyn-qazaqstandyq-boksshy-aqsh-tagy-zhengisinen-keiin-pikir-bildirdi/