Бокстан Қазақстанның ерлер құрамасының бас бапкері Қайрат Сәтжанов YouTube желісіндегі "Бірінші бол" арнасына берген сұқбатында төрешілердің әділдігіне қатысты мәселеге пікір білдірді. Бұл туралы KAZ.NUR.KZ хабарлайды.
Қайрат Сәтжанов кей жарыстарда боксшылар мен жанкүйерлердің төрешілерге көңілі толмай жататынын тілге тиек етті. Бірақ ол өз шәкірттерін ештеңеге алаңдамай, тек мықтылығын дәлелдеу тырысу қажет екенін айтады.
"Иә, оны да жігіттерге айтып жатырмыз. Ештеңеден қорықпаңдар дедік. Шынында да таза жеңіс болады. Былай қарасаңыздар, кейде басқа жарыстарға барғанда төреші көмектесті деп айтып жатады. Біз төрешілердің әділ болғанын қалаймыз. Сондықтан құрамадағы әр спортшыға жарыстың таза болатынын айттық.
Өзбек құрамасын алатын болсақ, оларға біреу бірнәрсе алып берді деп айта алмаймын. Бес чемпион болса бесеуі де физикалық, техникалық жағынан мықты. Оларға біреу алып берді деу өтірік болады. Сондықтан ең бірінші біз өзіміз мықты болуымыз керек. Рингке шығып, жеңу керек. "Менің қолымды көтере ме, ананың қолын көтере ме?" деп тұрмау керек", - деді Қайрат Сәтжанов.
Айта кетейік, 16 тамызда Қайрат Сәтжанов бокстан Қазақстанның ерлер құрамасының бас бапкері болып тағайындалған еді. Сол уақыттан бері ұлттық құрамамен бірнеше оқу-жинын өткізіп үлгерді.
Мақаланың түпнұсқасы: https://kaz.nur.kz/sport/boxing/2174404-qairat-satzhanov-bokstagy-toreshilerding-adil-bolganyn-qalaimyz/
