Бокс федерациясының президенті Шахмұрат Мүтәліп қазақстандық жас боксшылардың әлем чемпионатындағы жетістігі туралы айтып, оларға берілетін сыйақы жөнінде сөз қозғады. Бұл туралы KAZ.NUR.KZ тілшісі хабарлайды.
Черногорияда өткен жастар арасындағы әлем біріншілігінде Қазақстан құрамасы 6 алтын, 1 күміс, 10 қола медаль жеңіп алған еді. Осы көрсеткішпен команда жалпы есепте 1-орынға ие болып, бұрын-соңды болмаған жетістікке жетті. Cондай-ақ АҚШ-та World Boxing ұйымдастыруымен өткен алғашқы әлем чемпионатында екі қазақстандық жас боксшы күміс жүлдені қоржынға салды.
Әлем біріншілігінде Қазақстан намысын абыроймен қорғаған былғары қолғап шеберлері бүгін, 5 қарашада елге келді. Оларды қарсы алуға барған бокс федерациясының президенті Шахмұрат Мүтәліп KAZ.NUR.KZ тілшісіне шағын сұқбат беріп, жас спортшылардың нәтижесі туралы айтты.
– Боксшыларымыз жоғары деңгейде өнер көрсетті, тарихи нәтиже тіркеді. Бұған дейінгі статистиканы қарайтын болсаңыздар, 90-жылдардан бастап боксшыларымыз екі алтыннан артық алмаған. Сондай-ақ бұған дейін біз жалпыкомандалық есепте бірінші орында болмағанбыз.
Сонымен бірге Шахмұрат Мүтәліп Черногорияда болған әлем чемпионатындағы төрелік туралы сөз қозғады.
– Ашығын айтсақ, бір-екі жекпе-жекте бұра тартушылық болды. Бірақ бокста бұндай жағдайлар тіркеліп тұрады. Десе де соған қарамастан біздің боксшылар жақсы нәтиже көрсетті.
Федерация президенті боксшылар тарихи жетістікке жеткендіктен, оларға берілетін ақшалай сыйақыны көбейту жоспарланып отырғанын айтты.
– Жақында бір жиын жасап, боксшыларға федерация тарапынан ақшалай сыйлық табыстаймыз. Бізде ереже бойынша, бірінші орынға 3 млн, екінші орынға 1,5 млн, ал үшінші орынға қателеспесем 1 млн теңге беріледі. Бірақ қазір ақылдасып жатырмыз, бұл соммалар көбейеді. Өйткені тарихи нәтиже тіркеліп отыр, ұл-қыздарымыз бірнеше рет әнұранымызды шырқатып, көк туымызды желбіретті, - деді Шахмұрат Мүтәліп.
Еске салайық, жастар арасында әлем чемпионы атанған қазақстандық боксшы Төрехан Сабырхан ендігі жоспарын бөліскен еді.
Мақаланың түпнұсқасы: https://kaz.nur.kz/sport/boxing/2183112-boks-federatsiiasynyng-prezidenti-sportshylardyng-syiaqy-molsheri-zhaily-aitty/
