Бокстан әлем чемпионатында бірден бес қазақстандық спортшы алтынға таласады

Бокстан Қазақстан ұлттық құрамасының өкілі Елдана Тәліпова Сербияда өтіп жатқан әлем чемпионатында команда сапынан өткен бесінші финалист атанды, деп хабарлайды KAZ.NUR.KZ тілшісі.

Жартылай финалда 81 келіден жоғары салмақ дәрежесінде Тәліпованың қарсыласы молдовалық Дарья Сазонова болды.

Қазақстандық спортшы бүкіл жекпе-жекте басым нәтиже көрсетіп, төрешілердің бірауыздан қабылдаған шешімі бойынша 5:0 есебімен жеңіске жетті.

Елдана Сербияның Ниш қаласында өтетін әлем чемпионатының финалдық жекпе-жегіне жолдама жеңіп алған бесінші қазақстандық спортшы атанды.

Бұған дейін финалдық кезеңге Назым Қызайбай, Алуа Балқыбекова, Виктория Графеева және Аида Әбікеева өткен болатын.

Наталья Богданова әлем чемпионатындағы өнерін қола медальмен аяқтады.

2025 жылғы әлем чемпионатының финалдық жекпе-жегі 16 наурызда өтеді.

Мәтіннен қате тапсаңыз, бізге жазыңыз