ҚКБФ Жәнібек Әлімханұлының В сынамасы ашылуына байланысты мәлімдеме жасады

Қазақстан кәсіпқой бокс федерациясы президентінің атынан Жәнібек Әлімханұлының В сынамасы ашылуына қатысты ресми түсіндірме мәлімдеме жарияланды, деп хабарлайды KAZ.NUR.KZ.

Мәлімдеме федерацияның желі парақшасында жарияланған.

"Бүгін АҚШ-тың Юта штаты, Солт-Лейк-Сити қаласында қолданыстағы халықаралық антидопингтік регламенттер аясында және барлық процессуалдық талап қатаң сақтала отырып, спортшы Жәнібек Әлімханұлының В сынамасын ашу рәсімі өткізілді.

Аталған рәсім принциптік маңызға ие, өйткені ол объективті әрі тәуелсіз қараудың негізгі элементі болып табылады. В сынамасын ашу спортшы командасының өкілдерінің, тиісті сала мамандарының, сондай-ақ белгіленген тәртіпте процеске жіберілген барлық мүдделі тараптың қатысуымен өтті. Бұл кез келген процессуалдық бұзушылықтардың болу мүмкіндігін толықтай жоққа шығарып, барынша ашықтықты қамтамасыз етеді.

Рәсім нәтижесінде В сынамасы мөрленіп, осындай зерттеулер жүргізуге уәкілетті, аккредиттелген халықаралық зертханаға ресми түрде тапсырылды. Талдау бірыңғай стандарттарға сәйкес, қандай да бір араласусыз немесе сыртқы ықпалсыз жүргізілуде.

Айрықша атап өткім келеді: осы кезеңде қандай да бір қорытынды жасауға, айып тағуға немесе түсіндірме беруге құқықтық та, фактілік те негіздер жоқ. Қазақстан кәсіпқой бокс федерациясы спортшының кінәсіздік презумпциясын және рәсімге деген құрметті дәйекті әрі принципті түрде ұстанады.

Біздің ұстанымымыз өзгеріссіз қалады:

• Федерация таза әрі адал спортты қолдайды;
• Федерация халықаралық антидопингтік тетіктерді құрметтейді;
• Федерация ресми зертханалық қорытынды алынғанға дейін алыпсатарлыққа, қысымға және ақпараттық шуға жол бермейді.

Біз бұл жағдайға қоғам тарабынан қызығушылық жоғары екенін түсінеміз, сондықтан сабырлы, байыпты әрі тек құқықтық алаңда әрекет етуді өз міндетіміз деп санаймыз. Тек зертханалық талдаудың ресми нәтижелері ғана алдағы шешімдер мен жария мәлімдемелерге негіз болады.

Жағдайдың одан әрі дамуы туралы белгіленген тәртіппен, уақтылы және расталған құжаттар негізінде хабарланатын болады", - делінген Қазақстан кәсіпқой бокс федерациясының президенті Рахимжан Ерденбековтің мәлімдемесінде.

Мәтіннен қате тапсаңыз, бізге жазыңыз