Абай облысының Ақсуат ауылында "Тұғыры биік Тарбағатай" өнер және спорт фестивалі аясында қазақ күресінен Ырғызбай Досханаұлы атындағы әлем кубогы өтті, деп хабарлайды KAZ.NUR.KZ.
Дүбірлі додаға 15 мемлекеттің балуандары қатысты. Жарыс халықаралық "Қазақ күресі" федерациясы бекіткен ереже бойынша өтті.
Балуандар 70 келі, 90 келі және +90 келі салмақ дәрежесінде күш сынасты. Жарыс нәтижесі бойынша Қазақстан жалпыкомандалық есепте бірінші орын алды.
Барлық үш салмақ дәрежесінде қандастарымыз чемпион атанды.
70 келіде Қуандық Шадияр ақтық айқаста Тәжікстан елінің өкілі Хусаинзада Мохаммедраджаны ұтты. Қола жүлдені грузиялық Ника Техикаидзе мен ирандық Чокри Турия жеңіп алды.
90 келіге дейінгі салмақта Әсет Ахметжанов екі дүркін Гран-при жеңімпазы атанды. Финалда отандасымыз өзбекстандық Умар Бозаровтан басым түсті. Ирандық Саид Мохаммедриза мен тәжікстандық Суруш Каримов қола медаль еншіледі.
Ең ауыр салмақ дәрежесінде (+100 келі) Нұрым Сәлімгереев топ жарды. Ол шешуші жекпе-жекте грузиялық Грегори Шакирашвилиден айласын асырды. Өзбекстандық Мухсин Хисамутдинов пен әзірбайжандық Мохамедзада Мохаммед қола жүлдеге қол жеткізді.
Айта кетейік, қазақ күресінен Ырғызбай Досханаұлы атындағы әлем кубогы биыл оныншы рет өтті.
Мақаланың түпнұсқасы: https://kaz.nur.kz/sport/fight/2027217-qazaq-kuresinen-yrgyzbai-dosxanauly-atyndagy-alemdik-gran-pridin-zenimpazdary-anyqtaldy/
