Өзбекстанға әйелдер күресінен тұңғыш Олимпиада жолдамасын сыйлаған қазақ қызы Ақтеңге Кеунимжаева тарихи жетістігі туралы айтып берді. Бұл туралы KAZ.NUR.KZ Turkistan.kz сайтына сілтеме жасап хабарлайды.
Ақтеңге Кеунимжаева 1999 жылы Өзбекстан құрамындағы Қарақалпақстан Республикасының астанасы Нөкіс қаласында дүниеге келген. Ұлты – қазақ. Ол жақында Бішкекте өткен күрес түрлерінен Азия құрлығының іріктеу турнирінде Өзбекстан атынан бақ сынып, Олимпиада жолдамасын жеңіп алды. Осылайша, Өзбекстан тарихында әйелдер күресінен жолдама иеленген алғашқы спортшы атанды.
"Ішімнен "Ел істемегенді мен істеймін, елдің қолынан келмегенін мен іске асырамын" деп ойлап жүретінмін. Мұның қолымнан келетінін сездім, өз-өзіме сендім. Бардым. Күрестім. Дегеніме жеттім. "Олимпиадаға жолдама алған тұңғыш қызбын", "Жалғыз балуанмын" деп көкірегімді керіп, асыра сілтеуден қорқамын. Сол үшін де жаңалықтарды көп оқымауға тырысамын.
Дегенмен алда іріктеу турнирлері бар. Құдай қаласа, біздің қыздар онда ел намысын абыроймен қорғап, жолдама ұтып алады деп сенемін. Қазақстанға да соны тілеймін. Шыны керек, Бішкекте Жәмила Бақбергенова жолдаманы қалтасына басар деп ойлаған едім. Жұлдыз Ешімова да жақсы күрескен. Екі Олимпиадаға қатысқан мықты атлет. Алайда қазақстандық балуан қыздар жолдама иелене алмады. Бұйырса, бола жатар", – деді Ақтеңге Кеунимжаева.
Айта кетейік, әйелдер күресінен Қазақстан құрамасы Бішкекте (Қырғызстан) өткен іріктеу турнирінде бірде-бір Олимпиада лицензиясын иелене алмады.
Мақаланың түпнұсқасы: https://kaz.nur.kz/sport/fight/2093852-ozbekstanga-olimpiada-zholdamasyn-syilagan-qazaq-qyzy-tarihi-zhetistigi-turaly-aitty/
