Еркін күрестен Қазақстан ұлттық құрамасы Амманда (Иордания) өткен 23 жасқа дейінгі балуандар арасындағы Азия чемпионатында өнер көрсетіп, 8 медальға қол жеткізді. Бұл туралы KAZ.NUR.KZ Ұлттық Олимпиадалық комитеттің ресми сайтына сілтеме жасап хабарлайды.
Қазақстандық балуандар бұл турнирде сегіз жүлде еншіледі.
Мерей Базарбаев (61 кг дейін) пен Шамсат Таир (86 кг дейін) Азия чемпионы атанып, алтыннан алқа тақты.
Ал Сұлтан Құрманғалиев (50 кг дейін), Рүстем Мырзағалиев (79 кг дейін), Әкежан Айтбеков (97 кг дейін) тұғырдың екінші сатысына көтерілді.
Олжас Қожақанов (70 кг дейін), Нұрдәулет Бекенов (92 кг дейін), Бекзат Әкімбай (125 кг дейін) қола медальға қол жеткізді.
Осылайша Азия чемпионатының қорытындысы бойынша балуандарымыз 2 алтын, 3 күміс, 3 қоланы еншілеп, жалпы командалық есепте 2-орынға жайғасты. Ал бірінші орынды Үндістан құрамасы еншілесе, үшінші орынға Қырғызстан құрамасы жайғасты.
Айта кетейік, Иорданияның Амман қаласында ұйымдастырылған бұл дода 22 маусым мен 30 шілде аралығында өтті.
Мақаланың түпнұсқасы: https://kaz.nur.kz/sport/fight/2126706-erkin-kuresten-qazaqstan-ulttyq-quramasy-aziia-chempionatynda-8-zhuldege-qol-zhetkizdi/
