Дзюдодан жасөспірімдер арасында әлем чемпионы атанған Санжар Ерұланұлы жеңісіне қатысты пікір білдірді. Бұл туралы KAZ.NUR.KZ Ұлттық Олимпиадалық комитеттің ресми сайтына сілтеме жасап хабарлайды.
Санжар Ерұланұлы Лимада (Перу) өткен әлем біріншілігінде 90 кг салмақ дәрежесінде белдесіп, финалға дейін жетті. Ол ақтық сында украиналық дзюдошы Лебид Дмитродан уақытынан бұрын иппон ұпайымен басым түсіп, алтын медаль еншілеген еді.
"Жеңісімді барша қазақ еліне арнаймын. Менің жеңісім Конституция күнімен тұспа-тұс келді. Сондықтан ерекше қуаныштымын. Енді бұл биікпен тоқтап қалмай, алға басамын", - деді жас спортшы.
Айта кетейік Перудегі әлем чемпионатына 48 елден 403 жас дзюдошы қатысты. Әлемдік рейтингте 5-орында тұрған Санжар Ерұланұлы жарысты екінші айналымнан бастады. Ол турнир барысында 4 кездесу өткізіп, төртеуінде де қарсылас шақ келтірген жоқ. Енді Санжар бастаған дзюдошылар Алматыда өтетін Азия кубогінде бақ сынайды.
Мақаланың түпнұсқасы: https://kaz.nur.kz/sport/fight/2155990-qazaq-eline-arnaimyn-qazaqstandyq-dziudoshy-alem-chempionatyndagy-zhengisin-qorytyndylady/
