Албания астанасы Тиранада өткен әлем біріншілігінде Нұрқожа Қайпанов алтын медаль жеңіп алған еді. KAZ.NUR.KZ еркін күрестен қазақтан шыққан екінші әлем чемпионы туралы мәліметтерді ұсынады.
Қайпанов Тирана бозкілемінде 70 кг салмақ дәрежесінде жеңімпаз атанған болатын. Ол финалда жапон балуаны Ешиносуке Аоягиден 5:3 есебімен басым түсті.
Нұрқожа Қайпанов 1998 жылы Қызылорда облысы, Арал қаласында дүниеге келген. 2007 жылы отбасымен Ақтөбеге қоныс аударып, спорттағы алғашқы қадамын сол жақтан бастады. Ал 6-сыныптан соң Солтүстік Қазақстан облысы, Петропавл қаласындағы спорт мектеп-интернатына оқуға түскен. Балуан қазір жарыстарда СҚО намысын қорғап жүр.
2019 жылы Нұрқожа алғаш рет Азия чемпионы атанды. Ол Қытайда өткен жарыста 70 кг салмақта белдесіп, финалда жапониялық Коджира Шиганы 9:0 есебімен жеңген еді.
Ал 2021 жылы қазақ балуаны Азия біріншілігінде екінші рет топ жарды. Алматыдағы құрлық додасында 74 кг салмақта күрескен ол ақтық сында ирандық Мустафа Хоссейнханидің жауырынын жерген тигізген болатын.
Нұрқожа Қайпановтың 2019 жылы еркін күрестен қазақтан шыққан тұңғыш әлем чемпионы атануға мүмкіндігі болды. Ол Астанада өткен әлем біріншілігінің финалына дейін жеткен еді. Бірақ ақтық белдесуде ресейлік Давид Баевтен ұтылып, күмісті қанағат тұтты.
26 жастағы Нұрғожа екі лицензиялық турнирде де жеңіліп, Париж Олимпиадасына бара алмаған болатын. Алдымен 2023 жылы Белградта (Сербия) болған күрес түрлерінен әлем чемпионатының жұбаныш белдесуінде Жапония өкілі Даичи Такатаниден жеңіліп қалды. Осы жарыста Ризабек Айтмұхан еркін күрестен қазақтан шыққан тұңғыш әлем чемпионы атанды.
Биыл сәуірде Нұрқожа Бішкекте (Қырғызстан) өткен доданың жартылай финалында Иран спортшысы Йонес Эмамимеге есе жіберіп, Париж Олимпиадасының жолдамасынан қағылды.
Айта кетейік, Нұрқожа Қайпанов – ел тарихындағы ең көп жүлде иеленген балуандардың бірі. Оның еншісінде Азия чемпионатының екі алтыны (2019, 2021), Азия біріншілігінің және әлем чемпионатының күмісі (2022, 2019) және әлем біріншілігінің көптен күткен алтыны (2024) бар.
Мақаланың түпнұсқасы: https://kaz.nur.kz/sport/fight/2181656-erkin-kuresten-qazaqtan-shyqqan-ekinshi-alem-chempiony-nurqozha-qaipanov-turaly-ne-bilemiz-foto/
