29 қарашада Астанада еркін және грек-рим күресі бойынша Wrestling Stars халықаралық турнирі өтеді. Бұл жарыста әлемге әйгілі балуандар бас қосады, деп хабарлайды Ұлттық Олимпиадалық комитеттің ресми сайтына сілтеме жасаған KAZ.NUR.KZ.
Турнирдің басты жұлдызы еркін күрестен екі дүркін әлем чемпионы, төрт дүркін Еуропа чемпионы, Рио Олимпиадасының қола жүлдегері Франк Чамисо (Италия) болмақ. Сонымен бірге елорда бозкілеміне еркін күрестен Азия чемпиондары Данияр Қайсанов пен Санжар Досжанов шығады.
Бұдан бөлек жарысқа үш дүркін Азия чемпионы, әлем чемпионатының қола жүлдегері Азамат Дәулетбеков (еркін күрес), еркін күрестен Ресей чемпионы Алан Багаев, жастар арасындағы әлем чемпионатының жеңімпазы Исхар Кұрбаев (грек-рим күресі), грек-рим күресінен әлем чемпионатының күміс жүлдегері Қорлан Жақанша, сондай-ақ U23 әлем чемпионатының алтын жүлдегерлері – еркін күрестен Начын Куулар мен Ұлықбек Жолдошбеков (Қырғызстан) қатысады.
Еске салайық, 18-24 қараша аралығында Армения астанасы Ереванда өтетін күрес түрлерінен әскерилер арасындағы әлем біріншілігіне қатысатын қазақстандық балуандар белгілі болған еді.
Мақаланың түпнұсқасы: https://kaz.nur.kz/sport/fight/2190032-erkin-kuresten-olimpiadada-zhulde-algan-aigili-baluan-astanada-kuresedi/
