Еуропа біріншілігінің А тобында өнер көрсететін Швейцария мен Германия құрамалары кездесті. Бұл ойында қос команда тең нәтижені қанағат тұтты, деп хабарлайды KAZ.NUR.KZ.
Ойын "Франкфурт Арена" стадионында өтті.
Матчтың 17-минутында Германия ұлттық құрамасының жартылай қорғаушысы Роберт Андрих айып алаңының сыртынан гол соққан болатын. Алайда төреші VAR-ды тексергеннен кейін бұл гол есепке алынбады.
Ойынның 28-минутында Швейцария ұлттық құрамасының жартылай қорғаушысы Ремо Фройлердің берген пасын шабуылшы Дан Ндой қақпаға тоғытып, швейцариялықтарды алға шығарды.
Ал ойынның 90+2 минутында Германия ұлттық құрамасының шабуылшысы Никлас Фюллькруг гол соғып, есепті теңестірді.
Ойын соңына дейін осы есеп сақталды. Қос команда тең нәтижені қанағат тұтты.
А тобының үшінші тур ойындарының нәтижесі бойынша Германия 7 ұпаймен, Швейцария 5 ұпаймен плей-оффқа тікелей жолдама алды. Ал осы топта өнер көрсететін Шотландия мен Венгрия құрамалары үшінші тур аясында кездесіп, венгриялықтар 1:0 есебімен жеңіске жетті. Сөйтіп, турнирлік кестеде Венгрия 3 ұпаймен үшінші орынға жайғасса, Шотландия 1 ұпаймен соңғы орынды місе тұтты.
Айта кетейік, топтық кезеңде бірінші және екінші орын алған құрамалар, сондай-ақ әр топта үшінші орынды межелеген құрамалар арасында нәтижесі жоғары ең үздік төртеуі плей-оффқа жолдама алады.
Германиядағы Еуропа біріншілігінде 24 құрама бақ сынап жатыр. Топтық кезең 26 маусымға дейін жалғасса, плей-офф кезеңі 29 маусымда басталады.
Мақаланың түпнұсқасы: https://kaz.nur.kz/sport/football/2122587-euro-2024-teng-oiyn-shveitsariia-men-germaniia-quramalaryn-plei-offqa-zheteledi/
