Еуро-2024: Роналду бастаған Португалия құрамасы мерзімінен бұрын плей-оффқа өтті

Футболдан Еуропа чемпионатының екінші турында Португалия құрамасы Түркияны ұтып, мерзімінен бұрын плей-офф кезеңіне жолдама алды. Бұл туралы KAZ.NUR.KZ тілшісі хабарлайды.

F тобындағы екі құрама Дортмундта (Германияда) кездесті. Бұл ойын 3:0 есебімен португалиялықтардың пайдасына шешілді.

Матчтың 21-минутында Португалия құрамасының ойыншысы Бернарду Силва есеп ашты. 7 минуттан кейін Түркия командасының қорғаушысы Самет Акайдин өз қақпасына гол соғып алды. Алғашқы тайм 2:0 есебімен аяқталды.

Екінші таймда португалиялық жартылай қорғаушы Бруну Фернандеш командаласы Криштиану Роналдудың пасын голға айналдырды. Осылайша, Португалия құрамасы 3:0 есебімен жеңіске жетіп, F тобында 6 ұпаймен көш бастады да, Еуро додасының плей-офф кезеңіне жолдама алды.

Посмотреть эту публикацию в Instagram

Публикация от Instagram

Айта кетейік, Португалия құрамасы бірінші турда Чехияны 2:1 есебімен жеңсе, Түркия командасы Грузиядан 3:1 есебімен басым түскен еді. Енді 26 маусымда үшінші тур аясында Португалия – Грузия, Чехия – Түркия матчтары өтеді.

Футболдан Еуропа чемпионаты Германияның 10 қаласында өтіп жатыр. Топтық кезең 26 маусымға дейін жалғасса, плей-офф кезеңі 29 маусымда басталады.

Мәтіннен қате тапсаңыз, бізге жазыңыз